السلام عليكم ورحمة الله وبركاته

 

Because this "competition" is Arabic, this blogpost will be in Arabic. 

لاحظت إن مسابقة القراءة العربية بدأت، و إن شاء الله أكون منزلة هالتدوينة في وقتها.
أنا شاركت في تحدي القراءة العربية السنة إلي فاتت ووصلت لمرحلة التحدي بين مدن المملكة ولا كملت من هناك

ولكن الحمد لله كانت تجربة مرة حلوة واستفدت واستمتعت بها. ووسعت أفقي القرائية بفضل ربي

//////

وش هذه المسابقة أساسًا؟

هي تحدي لقراءة الكتب العربية يقام سنويًا بين الدول العربية ، والفئات المشاركة تتراوح بين أول صف من صفوف الابتدائي وآخر صف من صفوف الثانوي (بتعبير ثاني هو بين الصف 1 إلين الصف 12 ) والمطلوب منك في المسابقة قراءة وتلخيص 50 كتاب في جوازات السفر إلي يعطونك هي (جوازات السفر هي دفاتر تملين فيها معلومات عن الكتاب وتلخيص) 

وش الهدف منها؟

 تشجيع قراءة الكتب العربية عند الطلاب وتنمية حب القراءة وزيادة الثقافة العربية

بس للبنات؟ 

لا ، الأولاد بعد لهم مجال في المشاركة

كيف شاركت؟

شاركت عن طريق مدرستي ، أرسلت لهم إيميل باسمي وصفي وعدد الكتب إلي قراءتها في الفترة ذيك ، كان قصدهم كتب عربية  وعددها كان 1 في ذيك الفترة ، وما توقعت إنهم يقبلوني بذاك العدد بس الحمد لله قبلوني مع كم وحدة من بنات المدرسة.، لأن المهم  إنكم تقرأون العدد المطلوب من الكتب قبل التصفية الأولى وتملينها في جوازات السفر 

طريقة الاشتراك تختلف من مدرسة إلى مدرسة فروحوا اسألوا المشرفة أو المسوؤلة عن هالأشياء عن كيف ممكن تشتركون في التحدي. 

ليش شاركت؟

أنا متعودة اقرأ كتب انجليزي ، وكوني عربية حسيت ضروري إن أبدأ استكشف الكتب العربية وتكون جزء من قراءتي. وأدعم المؤلفين السعوديين والخليجيين والعرب زي ما أدعم الأجانب (ما فيه شي غلط أبدًا في دعم مؤلفين تحبونهم أيًا كان موطنهم، بس في رأيي ضروري تدعم كُتاب بلادك ) وهذا عشان إحياء الثقافة العربية واللغة العربية بيننا. 

كفاية إنها لغة القرآن، لغة اختارها ربي لأعظم ما قيل في التاريخ واختار رسول الأمة صلى الله عليه وسلم أن يكون ناطقًا بها. 

أقدر أقعد هنا ساعات بس أحكي عنها.. 

وش المعايير المطلوبة للكتب ؟

المهم إنه الكتاب عربي، نوعه ما يهم. 

ما قبل التصفية ، قراءتي وتلخيصي 

أنا زي ما قلت لكم متعودة اقرأ انجليزي (وما يزال مجموعة كبيرة من كتبي انجليزية بس صرت اقرأ عربي أكثر من أول) فمرة احترت وين ابدأ في رحلة الخمسين كتاب، فاقترحت لي معلمة العربي الله يجزاها خير إني اقرأ كتب انجليزية مترجمة، يعني أكون متعودة على أسلوبهم بس اللغة تصير غير. وهنا بديت لي بكم كتاب. 

وحظي الحمد لله حالفني لأن بنفس الفترة إلي كنت اقرأ فيها عشان المسابقة بدأ معرض الكتاب وأخذت لي مجموعة كتب منه (ما عجبتني أغلبها بس عاد نقرأ ونتعلم). 

سوو لنا المدرسة مقابلة تجريبية مع مشرفة العربي حقتنا الله يعافيهم ومرة ساعدنا هذا إننا ندرب لغتنا وإحنا نحكي بالفصحى (إي المقابلة ضروري فيها تتكلمين بالفصحى ، بس لا تخلين هذا يخوفك تراه أسهل بمراحل من ما تتوقعين ولا تضغطين على نفسك إنك تخلينها مثالية ، توكلي على الله وسوي إلي عليك) 

لخصت كل الكتب في يوم واحد، وهذا لأنه جا تعميم مفاجئ للمدرسة إنه التصفية بكرا وإنا لسا في بدايات جوازات السفر (مليت نص الأول وعشان انشغلت مع المدرسة كنت مأجلة الباقيين لبعدين ) أخذني يوم كامل وبعد ما خلصت كل الكتب ، مليت الجواز الأخير في المدرسة وكملت في المكان حق التصفية. 

التصفيات
التصفية الأولى تكون بين مكاتب المنطفة التعليمية. يعيني بين مدارس مكتب وسط أو مكتب شرق وهكذا..  رحت مع بنات مدرستي المشاركات.
التصفية تبدأ بالابتدائي بعدبن المتوسط والثانوي. انصحكم ما تدخلون أول شي عشان تأخذون فكرة عن المقابلة إذا هي أول مرة لكم. بس المقابلة كانت بسيطة. يبدأون الحكام بإنهم يخلونك تعرفين عن نفسك، وممكن يسألونك كم سؤال عنك. ولا تنسون الكلام بالفصحى. بعدين يختارون كتاب ويسألونك سؤال عنه (ممكن يكون ما رأيك في شي معين من الكتاب ولا وش الأشياء إلي ناقشها الكاتب ولا كيف ممكن تربطينها بالواقع.. هذا كم مثال بس لا تتقيدون فيه وتذكروا إنه الحكام أغلب الأحيان ما قرأوا الكتب ويهمهم طريقتك في الحديث عنه مو قد إيش حافظة منه) ومن ذيك الأسئلة كانت بعض الأسئلة العامة. وحدة من الكتب إلي قرأتها كان فيها رجل عنده صعوبة مادية لأنه لقى صعوبة في مجال عمله. يوم قلت لهم عنه سألوني "كيف تحسين إننا قاعدين نتعامل مع الفقر في المجتمع؟" ففي أسئلة عامة ما تقتصر على الكتب

كل المراحل مشابهة لبعض لكن يختلفون في المكان ، بس في آخر مرحلة وصلت لها (تصفية مدن المملكة) طلبوا مننا إنه يكون لنا خلفية في عواصم المدن ورؤية 2030 بس مدري ليش.  لأنهم ما سألوني عنها. بس قبل لا تدخلون المقابلة ناقشوا أو إسألوا إلي طلعوا
.ممكن يساعدونكم حتى لو ما كانت مقابلتك زيهم
ولا تخافون إنكم تحطون كتب ما أعجبتكم وتقولون إنها ما أعجبتكم وليش ، ترا تنوع الرأي نقطة في صالحكم.

بعد تصفية كل مكتب لطلابه ، يتم التصفية لطلاب ذيك المدينة (المتأهلين من كل مكتب يتجمعون عشان يتم التصفية بينهم ) وآخر مرحلة وصلت لها هي التصفية بين مدن المملكة وبعدها خسرت.
لكن الحمد لله أبدَا ما ندمت على هذه التحربة، ما توقعت يمديني أشارك أساسًا بالقدر إلي كنت فارئته ،  لكن تحديت نفسي وطلعت برا مكان راحتي بمشاركتي في هذه المسابقة وقراءتي لذيك الكتب.

بعض الاقتراحات للكتب
لو أنتم مثلي قراءة الكتب العربية شي مو من عادتكم تتجهون له جربوا الكتب المترجمة من لغة إلى عربي. يصير جوها جو شي معتادين عليه في الاجنبي لكن بلغة ثانية.
شي ثاني ممكن يساعد إنه لو تلقون كُتاب عرب من بلدكم يتكلمون عن نفسهم أو تجاربهم هذا ممكن يكون شي سهل في القراءة لأنه يصير صوت كتابي مو غريب عليك. لكن أنا ما أحب الكتب إلي تنكتب بالعامية أبد وأبعد عنها فمو هذا إلي أقصده، أقصد لو يكون الكتاب سعودي مثلًا وأنتِ سعودية أو أنتِ خليجية والكاتب خليجي يسهل تكوين اتصال بينك وبين الكاتب وبالتالي يسهل عليك القراءة. بس لا تخلون هالشي يحدكم من إنكم تستكشفون وتتفرعون. أصلًا شوي شوي إن شاء الله بتلقونكم كل ما رحتوا مكتبة سحبتوا لكم كتاب عربي مع الاجنبي. وشوي شوي يتعرفون إلي يعجبكم وإلي ما يعجبكم بس خلنا على موضوع كتب المسابقة.

الروايات بعد مقبولة وأعرف إنها تجي على أنواع ومراحل لكل قارئ فممكن تاخذون لكم منها.
ما أنصحكم بقراءة السلسلات الروائية أو بشكل عام سلسلات كتب لهذه المسابقة، مو حلو تملين كم جواز سفر ببس هاري بوتر ولا الأخوان كرامازوف. ممكن تحطون الكتاب الأول بس مو حلو في صالحكم إنه كله شي واحد. التنوع ثم التنوع.

اقترح عليكم ترجمة مكتبة جرير لروايات أغاثا كريستي، مرة حلو أسلوبهم ولا حسيت إنه اختلفت القصة مع اختلاف اللغة (يصير كثير في الترجمات) كل التشويق والإثارة ما غادرها وما كان فيه اختلاف كبير عن الأسلوب الانجليزي.

الخيميائي، الكتاب بطل وأحلى الكتب الانجليزية إلي قرأتها. وفي منه ترجمة عربية لليبي يقرأه للمسابقة.

انتبه أمامك معبر عزلان للكاتب بندر العصيمي كان مب شين، الصراحة ليومكم هذا ما خلصته (مو شي أنصح فيه وكنت بخلصه لولا ضيق وقتي، وكنت مخلصة جزء كويس منه) الكتاب استفدت منه كثير وكان مثير للاهتمام بس كل ما خلصت كم جزء ما اتشجع أكمل الباقي. وهذا مؤسف لأن الكتاب فيه تجارب غنية ومواقف طريفة وحكم  فما أدري هل لأنها سردت على طريقة يوميات ولا طريقة الكاتب نفسه.. ما أعرف ليش ما اتشجع له.

تجاوز للشاعر زين بن الشيخ عبد الله ، هو أول تجربة لي في قراءة الشعر العربي المعاصر وكلمة جميل قليلة في حقه. كان خفيف وسريع رغم قوة المشاعر في كتابته. وتفسيم الكتاب جميل وطريقة كتابته جميلة ومواضيعه جميلة .. لو اتكلم عشرة سنين قدام عنه أقدر.

بيكاسو وستاربكس للكاتب ياسر حارب أحلى كتاب عربي عندي فمستحيل ما اقترحه لأحد.

/////

وأحب اختتم هالتدوينة بقولي جربوا. القراءة تجربة وتحدي فلا تفكرون فيها كمسابقة و "أوه ليش ما قلت هذا صح" كونوا على طبيعتكم وبينوا شخصيتكم. إنتم أدخلوا كونه تحدي لأنفسكم وحتى لو ما تأهلتوا من المرحلة الأولى على الأقل جربتوا وقرأتوا كتب يمكن ما كنتوا بتقرأونها قبل. مب خسارة أبدًا بل تجربة حلوة.
واتمنى إنكم استفدتوا وإذا في أي أسئلة ثانية إسألوني ، وشاركوني تجاربكم :)

Follow me on instagram:
@copperandpaper